Նախկին գեղասահորդ հայ ծագումով Հայկ Ունդջյանը (Haig Oundjian), ով ներկայումս ապրում է Անգլիայում, Գիբրալթարի Bruno's Magpies ֆուտբոլային ակումբի փոխնախագահն է և հիմնական բաժնետեր, որը սենսացիա է առաջացրել Կոնֆերենցիաների լիգայում, հաղթելով իռլանդական «Դերի Սիթի»-ին և անցնելով որակավորման երկրորդ փուլ:
Այս ակումբը, որը հիմնադրվել է 2013 թվականին, ունի հետաքրքիր պատմություն՝ սկսած մի ընկերախմբից, որը հավաքվում էր Գիբրալթարի Bruno's կոչվող բարերից մեկում:
Bruno's Magpies-ը իր ճանապարհը սկսեց որպես սիրողական թիմ՝ միավորված ընդհանուր ֆուտբոլի նկատմամբ սիրով և ընկերական հավաքույթներով: Մի քանի տարիների ընթացքում նրանք կարողացան իրենց մասին հայտարարել և դառնալ պրոֆեսիոնալ մակարդակի ակումբ: 2019 թվականին թիմը հասավ նշանակալի հաջողության՝ բարձրանալով Գիբրալթարի Բարձրագույն դիվիզիոն: Այս իրադարձությունը դարձավ ակումբի պատմության շրջադարձային պահը, քանի որ անհրաժեշտ էին լրացուցիչ ֆինանսական ռեսուրսներ խաղի մակարդակը պահպանելու և մրցունակությունը բարձրացնելու համար:
Այդ ժամանակ ասպարեզում հայտնվեց Հայկ Ունդջյանը, ով տրամադրեց անհրաժեշտ ֆինանսական աջակցությունը և դարձավ ակումբի հիմնական բաժնետեր: Նրա ներդրումը միայն ֆինանսական ներդրումներով չի սահմանափակվում: Ունդջյանը ակումբին փոխանցել է իր հարուստ փորձը սպորտային կազմակերպությունների կառավարման մեջ: Նախկինում նա եղել է Մեծ Բրիտանիայի Գեղասահքի ազգային ասոցիացիայի նախագահը և «Ուոթֆորդ» ֆուտբոլային ակումբի փոխնախագահը:
Հայկ Ունդջյանը ձախից
Հայկ Ունդջյանը ունի նշանակալի սպորտային կարիերա: Որպես գեղասահորդ, նա երեք անգամ դարձել է Մեծ Բրիտանիայի գեղասահքի չեմպիոն: Երկու անգամ ներկայացրել է իր երկիրը Ձմեռային Օլիմպիական խաղերում՝ զբաղեցնելով 17-րդ տեղը 1968 թվականին և 7-րդ տեղը 1972 թվականին: 1971 թվականին նա նվաճել է բրոնզե մեդալ Եվրոպայի առաջնությունում, ինչը դարձավ իր սպորտային կարիերայի գագաթնակետը:
Հայկ Ունդջյանը Օլիմպիական խաղերում 1972 թ.
Ներկայումս Bruno's Magpies-ը գտնվում է «Ուրարտու»-ի հավանական մրցակիցների շարքում Կոնֆերենցիաների լիգայի որակավորման երրորդ փուլում: Թիմի հաջողությունը այս փուլում կախված կլինի «Կոպենհագեն»-ի դեմ իրենց հաղթանակից, ինչպես նաև «Ուրարտու»-ի խաղի արդյունքից «Բանիկ»-ի դեմ: