20-ամյա հայ կիսապաշտպան Արթուր Սերոբյանը, ով հանդես է գալիս «Արարատ-Արմենիա» ակումբում, ուշադրություն է գրավել մի շարք արտասահմանյան ակումբների կողմից։ Նրանց թվում են սլովենական «Ցելե» և ռուսական «Կռիլյա Սովետով» ակումբները։
«Ցելե» և «Արարատ-Արմենիա» ակումբների միջև Սերոբյանի տրանսֆերի շուրջ բանակցությունները ձգձգվել են ֆինանսական տարաձայնությունների պատճառով։ Արդյունքում, ամենայն հավանականությամբ, գործարքը չի կայանա, և Սերոբյանը, հավանաբար, կմիանա Սամարայի ակումբին։
Նախնական տվյալներով՝ «Կռիլյա Սովետով» ակումբը նախատեսում է վերցնել խաղացողին վարձակալությամբ, հետագայում տրանսֆերը գնման իրավունքով։ Ակնկալվում է, որ տրանսֆերի արժեքը կարող է կազմել 350-ից 400 հազար եվրո։ Սակայն այս հարցի վերջնական որոշումը կկայացնի Սամարայի ակումբի գլխավոր մարզիչ Իգոր Օսինկինը, ով ներկայումս մանրակրկիտ ուսումնասիրում է բոլոր թեկնածուներին։
Այս մասին հաղորդում է ինսայդեր Կարպովը և հաստատում հայ լրագրող Սուրեն Մելիքսեթյանը։
Չնայած ակտիվ խոսակցություններին տրանսֆերի մասին, «Արարատ-Արմենիա» ակումբի գլխավոր տնօրեն Պողոս Գալստյանը հայտարարել է, որ ակումբը պաշտոնական առաջարկ չի ստացել «Կռիլյա Սովետով» ակումբից։ Գալստյանը այսպես է մեկնաբանել իրավիճակը.
«Ինչքանով ես գիտեմ, Արթուր Սերոբյանը այժմ գտնվում է Երևանում։ Ես տեղյակ չեմ, չգիտեմ այս մասին։ Մեր ակումբը պաշտոնական նամակ չի ստացել «Կռիլյա Սովետով» ակումբից։ Խոսակցություններ շատ ակումբներից են գնում, բայց երբ պաշտոնական կլինի, այդ ժամանակ բոլորը կիմանան այս մասին», - ասել է Պողոս Գալստյանը Metaratings-ի հետ հարցազրույցում։
Ավարտված մրցաշրջանում Արթուր Սերոբյանը խփել է 9 գոլ 28 խաղերում բոլոր մրցաշարերում։ Սերոբյանը ունի 16 խաղ Հայաստանի ազգային հավաքականի կազմում։
