Երկու հայ մարմնամարզիկները՝ Արթուր Դավթյանը և Վահագն Դավթյանը, ավարտեցին իրենց ելույթները 2024 թվականի Օլիմպիական խաղերում և արդեն վերադարձել են Երևան: Զվարթնոց օդանավակայանում մարմնամարզիկներին դիմավորեցին շատ հանդիսավոր՝ երաժշտությամբ և պարերով:
Շատ երկրպագուներ և ԶԼՄ-ների ներկայացուցիչներ սպասում էին Հայաստանի հավաքականի մարզիկների և մարզիչների ժամանմանը: Ժամանումից հետո մարմնամարզիկները բաժանեցին ինքնագրեր և տվեցին փոքրիկ հարցազրույց:
2024 թվականի Օլիմպիական խաղերի արծաթե մեդալակիր Արթուր Դավթյանը նշեց, որ գոհ է իր ելույթից և որ կարողացել է բարելավել Տոկիոյի Օլիմպիական խաղերի արդյունքը (որտեղ նվաճել էր բրոնզ), բայց ցավում է, որ չկարողացավ ոսկի նվաճել: Նա մտադիր է հանդես գալ Լոս Անջելեսում կայանալիք հաջորդ Օլիմպիական խաղերում: Արթուրի կարծիքով՝ իր երկրորդ ցատկում բարդությունն էր պակասում․ ցատկը մաքուր էր կատարել, բայց հաղթողի՝ ֆիլիպինցի Կարլոս Յուլոյի բարդությունը 0.4 միավորով ավելի բարձր էր: Արթուրը նաև նշեց, որ դատավորները անարդարացիորեն չափազանց բարձր գնահատեցին Կարլոսի երկրորդ ցատկը:
Արթուր Դավթյանը գրավեց երկրորդ տեղը հենացատկում՝ 14,966 արդյունքով:
Մյուս հայ մարմնամարզիկը՝ Վահագն Դավթյանը, վեցերորդ տեղը գրավեց օղակների վրա վարժությունների եզրափակչում: Վահագնը գոհ էր իր արդյունքից, ինչպես նաև նրա մարզիչները: Նա ցույց տվեց իր առավելագույնը և իդեալական կատարում:
2024 թվականի Օլիմպիական խաղերը հայ մարզիկների համար շարունակվում են: Արդեն օգոստոսի 7-ին Արթուր Ալեքսանյանը կմրցի հունահռոմեական ըմբշամարտի եզրափակչում՝ իրանցի Մոհամեդհադի Սարավիի դեմ, իսկ Մալխաս Ամոյանը կպայքարի բրոնզի համար՝ մինչև 77 կգ քաշային կարգում: Եվս մեկ ըմբիշ՝ Սլավիկ Գալստյանը, կսկսի իր ելույթները օգոստոսի 7-ին, ինչպես նաև Երվանդ Մկրտչյանը՝ թեթև ատլետիկայում:
Օլիմպիադայի վերջին օրերին Հայաստանից հանդես կգան ևս երկու ազատ ոճի ըմբիշներ՝ Արսեն Հարությունյանը և Վազգեն Թևանյանը, ինչպես նաև երեք ծանրամարտիկներ՝ Անդրանիկ Կարապետյանը, Գարիկ Կարապետյանը և Վարազդատ Լալայանը:
